知识有无分贵贱？学习慨媒介慨地位又有无高低？听歌、睇电影、睇小说系咪就系嘥时间、荒废学业、蹉跎岁月？系咪将时间投放喺睇书、Ted talk、资讯节目先算得上有价值？

21世纪喺香港写一篇文，最重要当然系戴左头盔先，本人立场并不代表任何人立场，有时甚至唔代表自己立场，呢篇废文一字一句并无科学、文学、哲学、天文学…正确知识或基础。 

电影系一本书，可以系童话/图画/神话书，讲到尾就系一本故事书；生活可以有乐事/憾事/伤心事，讲到尾其实都系故事。知识，可以微观，可以宏观，探索空间，穿越时空，讲到尾其实就系距离。保持距离，能先令到人观察、学习、吸收。

（系咪开始有啲似考评局出慨作文题目—生活是XxY）

捞埋呢三样嘢，得出慨结论就系电影讲生活故事慨史诗，睇慨人可以用抽离慨角度审视、所赏生活慨本身，虽抽离但同时又投入角色慨感受同经历。令人投入慨原因可以好单纯，就系我哋都系人。每个人慨经历可以大相径庭，人慨地位可以有高有低，人品可以有贵有贱，但系人性总系相似。咁究竟呢啲可唔可以算得上系知识？答案因人而异，但系好肯定电影音乐呢一啲讲故事慨媒介，所带来慨价值绝对值得花时间品味。

一套Joker，可以单纯被理解成一个变态杀人犯慨故事，同时又可以从政治、哲学、社会科学等角度深入解读同赏识（详细可以自己搵影评同解读，非常值得一看），令人反思现今文明社会的光鲜究竟牺牲咗几多人慨尊严。一套电影，放大左一个社会齿轮甚至系微尘，渠哋慨经历同埋心路历程，打破咗呢个世界将一个人慨存在，量化又或者工具化慨常态，话俾呢个世界听，睇一个人唔系净系要睇佢生产到几多，或者渠对社会慨价值。但就凭渠系一个人，渠存在系呢个世界上，就已经有渠慨价值，渠慨感想同埋经历就值得我同你花时间同耐性明白同体谅。咁多年来慨观影经验话俾我听一样野：每一个人无论背景、地位、十恶不赦，渠背后肯定有个精彩慨故事，值得被人明白，亦能够被其他人明白，原因都系嗰个：单纯地渠都系一个人。标签、阶层、职业种种不同背后，其实都系一个人。

咁歌呢？听音乐、听流行曲、肯定无益啦！简直系嘥时间，好心就用嗰啲时间听BBC News啦！

不解释，自己睇翻BBC News

https://www.google.com/amp/s/www.bbc.co.uk/news/amp/world-europe-39429032

一个奖唔可以断定歌词、流行曲、音乐慨价值同地位，更加唔应该亦唔能够攞嚟用黎说服人听歌、欣赏音乐唔系一件浪费时间慨事情。（又戴头盔）

我只能话：一样野系咪浪费时间，系睇你对待渠慨心态，又或者你够唔够敏锐。够敏锐慨话，无所事事一个晏昼、摊系张床度，都可以有无限慨感想同埋灵感。只要你对生活敏感、乐于感受，每一首歌、每一条废片、每一套剧、每一套电影都能令到你慨生活更有质感。